• NOHA

البستان ج4

في مكتب ماجي، ماجي قاعدة بتقرأ لما تسمع خبط علي الباب و من غير ما ترفع عينيها عن اللي بتقرأه و تبص تشوف مين، تقول: ساعات المكتب خلصت..تعالي بكرة. الباب يخبط تاني.

ماجي و هي بترفع عينيها و صوتها: أنا قلت ساعات ال...

شاب طويل و حلو مش أكتر من 28 سنة يدخل المكتب و يقول: ممكن ساعات زيادة يا دكتورة؟ هعمل أي حاجة

ماجي تبصله و تبتسم.

الشاب: هلبس مايوه..كماريرة...

ماجي تقلع النضارة و تبتسم: تعالي هنا يا متخلف و أقفل الباب

الشاب يقفل الباب و يروحلها: دكترة..شكلك منور النهاردة. ماجي تحط دراعتها حوالين رقبته.

الشاب: المتخلف عايز يعرف أنتي عاملة أية النهاردة؟

ماجي: مش هضحك عليك..النهاردة يوم تقيل...

ماجي تخبط علي كتافه بسرعة لما تفتكر: بس عندي مكالمة مهمة جدا لازم أعملها

ماجي تقعد علي كرسيها و هو يوطي علي المكتب جنبها و يمسك صورة: هي دي البنت اللي أنتي عايزها؟

ماجي تهز راسها و تاخد الصورة: أختها...بص لو هتفضل هادي هتقعد، لو لأ يبقي أمشي..أخرج دلوقتي

الشاب بمرونة: ده كلام جامد جدا خاصة أن البيت اللي أنتي عايزة تستكشفيه يبقي بيتي..بس أوعدك أني هبقي كويس و مش هعمل دوشة.

الشاب يقعد علي الكرسي اللي أودام مكتبها و هي ترفع السماعة.

نانسي واقفة جنب كشك و باصة في الساعة بس شكلها متغير شوية - شعرها طول حبة و شكلها كبر حبتين، تليفون الكشك يرن

و الراجل صاحب الكشك يرد: ألو...مين حضرتك؟

نانسي باصله: هات هات. الراجل يديها السماعة.

نانسي: ألو..دكتورة ماجي؟

ماجي: أيوه..عاملة أية؟

نانسي: الحمدلله...بس صعب الواحد يبعد الناس عن التليفون هنا...أنا في البريك فلازم نتكلم بسرعة.

الشاب ماسك علبة فيها لعبة بتخرج لما تتنطر و هو عمال ينطرها لبره و مخلي ماجي مش عارفة تركز و هي بتشاورله علشان يبطل فيرجع يحط اللعبة تاني علي المكتب.

ماجي: ممكن نتكلم في وقت تاني لو عايزة

نانسي بأسي: لأ مش هينفع..أنا لسه عايشة هناك علشان أبقي جنب مي و بابايا عارف أنتي مين وعايزة أيه و مش موافق

ماجي بقلق: يعني مي مش هتيجي؟ الشاب يلف راسه و يبصلها أول ما تقول كده و يركز في الحديث.

نانسي: أنا بقول أن لو أنا جبت مي للبستان..أحتمال كبير ما أعرفش أرجع البيت تاني...أنا بالنسبة لي مش مشكلة بس مي ماينفعش ترجع من غير ما يكون حد هناك فاهمها.

ماجي مش فاهمة هي المفروض تعمل أيه وعمالة بتدعك في أورتها و بدأت تتوتر.

ماجي: و..و والدك و والدتك مش فاهمينها؟

نانسي: مامتي خايفة موت منها و بابايا...بابايا بيتهيألي بيكرهها...

ماجي بتصميم و كأن مفيش حاجة هتوقفها عن اللي هي عايزاه: أقدر أعملك أيه؟

نانسي: في مدرسة جديدة بره القاهرة بحبة صغيرة...للناس اللي زي مي...

نانسي تسكت لثانية و تضحك ضحكة خفيفة و تقول: لأ مفيش حد زي مي..ما أعتقدش بس...هي مدرسة للمراهقين اللي عندهم توحد...مكان كويس ليها...بصي أنا هبقي صريحة معاكي...3000 مش كفاية...لو وعدتيني ب 10000 يمكن أقدر..

ماجي ترد علطول: 10000 ماشي...هجيبلك الشيك النهاردة بعد الضهر.

الشاب أودامها يتخض و يقولها من غير صوت 10000!!!

ماجي تجيب ورقة و قلم: أنتي بتشتغلي فين؟

نانسي: لأ أستني أصبري عليا شوية..أنا محتاجة أفكر

ماجي: وقتي قصير يا أنسة نانسي

نانسي: أرجوكي ناديني نان..الكل بيناديني بيه

ماجي: أستاذ كريم...الشاب يبصلها و يركز معاها تاني بعد ما كان ماسك مجلة و بيقرأها.

ماجي مكملة: سمح أنه يفتحلنا البيت في أجازة 6 أكتوبر و فاضل 8 أيام بس...أنا محتاجة أعرف إذا كنت أقدر أعتمد علي وجود مي و لا لأ...بصي أنا عاملة زي محاضرة تعارف للمشتركين..هنا في الجامعة في قاعة بارتليت..يوم الأتنين بالليل.. لو ممكن مي تحضرها ؟

نانسي: لو مي راحت للبستان أنا هاجي معاها

ماجي: أكيد طبعا..أقدر أعرف أمتي يا أنسة نانسي؟ نان؟ أنا ممكن أدبأ 12000 لو وعدتيني دلوقتي أنك هتلتزمي بالرحلة. الشاب يبص لماجي و يبرأ و يهز في راسه مش مصدق اللي هي بتقوله.

نانسي: ما أقدرش...مع السلامة يا دكتورة

ماجي: هعرف ردك أمتي؟

نانسي: هكلمك

ماجي: أستني...المحاضرة يوم الأتنين بالليل

نانسي: مش عارفة..ما أتهيأليش. نانسي تقفل السماعة و ماجي تغمض عينيها و تتنهد مضايقة.

الشاب: 10000...12000؟!! أنا بدأت أفكر أني بيعت البيت بالرخيص

ماجي بتحط السماعة بأحباط: أنت ما بيعتوش..أنت أجرته...و ليومين بس...لازم أوصلها..أنا لازم أوصل لمي السيد

الشاب: ليه؟!

ماجي: أنا عندي مجموعة كويسة بس هما مجرد...شموع...تأثيرهم مؤقت...مي هي الشعلة هي النور الحقيقي اللي هيرشدنا...

لو أي حد يقدر يصحي البستان فهي الحد ده

كريم: أنا قولتلك قبل كده يا إم..صحيان البستان مش حاجة كويسة

ماجي بشدة و كأنها طفل شبطان: أنا عايزة مي...أنا عايزة مي السيد



تحياتي

نهي ماهر









#البستان#كتاب#قصة#ماوراء الطبيعة

#خارق#روح#روحانيات#قدرات

#مسكون#قصر#البيوت#بيت#مساكن#أعداء

#قصص#حواديت#مصر#خيال#أثارة#رعب

#كاتب#كتابة#أبداع#فن#فنان مصري

#مقالة#مدونة#رسم#شخبطة

Recent Posts

See All