• NOHA

علاقات تفشل لحوارات زي دي


لو قررت تركز في حوار قصادك هتلاقي كتير منها حوارات من جهة واحدة.

'واحد يسأل سؤال و واحد بيتكلم كتير'

و الشخص اللي بيتكلم كتير مش بيسأل أسئلة من ناحيته لكن بيرد مباشرة للشخص التاني ببيان أو تصريح.


كمثال


شخص 1: عامل أيه؟ أيه الأخبار؟

شخص 2: بأمانة الحمدلله الدنيا ماشية..في حاجات كتير بلاقيها ماشية..نقلت لشقة جديدة..بدأت شغل جديد..الدنيا لطيفة أوي

شخص 1: طب حلو أوي هايل..و أنت متعامل مع كل التغييرات دي مرة واحدة و كده؟

شخص 2: جدا..علي فكرة الحواوشي ده عظيم

شخص 1: أه أنا بحب الحواوشي

شخص 2: لا لا لا...أنا عاجبني الحواوشي ده أوي بجد...أنت عارف أنا دايما عاشق للحواوشي...الحواوشي و ٳلا فلا

شخص 1: أه فعلا حقيقي

شخص 2: أه أنا لو بأيدي..أفطر و أتغدي و أتعشي حواوشي كل يوم


لو أنتبهت شوية هتسمع شخص 1 حاسس بأيه..في لحظة في الحوار أنه مش مسموع

شخص 2 مش بيسأله مباشرة و بوضوح "و أنت عامل أيه؟"

بيستمر في الكلام (غالبا عن نفسه) و بيقول حاجات موجهة للشخص التاني بدل ما يسمح بفرصة للطرف التاني أنه يتكلم عن نفسه هو كمان.



دي من أكتر الأخطاء المتكررة في العلاقات الأنسانية

كتير بتؤدي لدمار العلاقة

بتوصل لصراع و عدم تفاهم غير ضروري

بتولد الأمتعاض و الكره جوانا


كل واحد فينا عايز يشارك بحتة من نفسه و لو محدش سأل الموضوع بيقلب بمرارة.

فبالتالي بنخلي الطرف التعبان يبطل يسأل وعشان بطل يسمع فأصبح الطرف الأولاني كمان تعبان و هلما جر.


الموضوع أبسط من كده


أولاً

لما تكون مع حد أسأل و أسمع حقيقي

لو مش عايز تسمع أنطق و قول أسبابك

و لو الموقف ده أتكرر، أسأل نفسك يا تري

* أنت فعلا منسجم مع الشخص من أصله؟

* هل العلاقة دي كويسة لحياتك حقيقي؟


ثانياً

الطرف اللي عايز يتكلم محتاج يطلع صوته مش بس عند السؤال، كمان عند الأحتياج

و ماتستناش لغاية ما تبقي بالونة و تنفجر في اللي حواليك

أعرف أن لو ماحبتش نفسك كفاية عشان تقف لنفسك و تقول أنا عايز أتكلم و من حقي أتكلم

و أنا بضايق عشان مش بتكلم، متوقع من اللي أودامك يحبك أكتر من نفسك ليه؟!




ها و أنت عامل أيه النهاردة :)




#حوار#نساء#علاقة#حب#أساءة#أنانية#سكوت

#أستني#بنات#صحة#شفاء#ألم#مؤذي

#تغيير#قوة#علاقات#سيطرة#صوت

#مسموع#أنطق#أسمع#أسأل#أتكلم#عبر

#طرف واحد#أخطاء#مرارة#تفاهم#تعبان

Recent Posts

See All